Aga Pulisimo Novia Gado…
SAKUYA eo naliu hie damo nakiri taita nanggita pulisi dako ri Gorontalo najadi topodade India. Pulisi ri ngatata hie aga novia gau, ledo nipopo ngirira kita, aga nipaka raura bo nipopo tumangira kita.
Eva kajadia ripua bongi ri jalan Veteran. Bara labi sapulu geira nakava ante motoro nanggaremba. Bara nuapa saba hai, mau banua ntona niliumakara nirempera pura. Motoro nidika ri bivi nu dala muni niduggasaka bo nigerora. Ana rabacata ri sura kabar ripua, ledo aga nanggeni laura geora, naria munimo sanu nanggeni taono.
Mpamulana dopa nisani nuapa nanggaremba hai. Bo bara wereramo rasani, saito topanggaremba hai nanavu kartu pulisina, sabanamo hai bo nisani bo pulisi tano nanggaremba. Kaupunapa vei, pulisi gahai riavi nisaka puramo, bo ni sel ri Polda.
Riavi na dapa muni vai. Ana mpulisi da sapua ampa mpae hamai ri Jalan Elang, nialana panaguntu ntomana bo hau nipomorekana ante roana nomore. Bo panaguntu hai muni bara naseta, tempona nidikanamo mata nu panaguntu ri balengga nuroana, nepogu mpu bo nosuvuraka peluru.
Kasiranga, sabana hai, napasa ranga balengga nungana nambela panaguntu. Bara sakuya ja nirawat ri ruma saki, nipomatenamo ranga saba hai.
Toma nu ngana hai muni bara ledo ria notona nomboli panaguntu. Bo mpodidakanamo panaguntu, kaupuna nipomoreka nu ngana. Ane vesiamo berimbamo? Toma nu nganamo hai mombatangguna. (TORIBOYA)
Tidak ada komentar:
Posting Komentar