PALU EOEO....

Pakabelo!!! Uda Nu Kadoa

SISI tempona vai nauda. Uda hie, ledo aga nompaka gege doyata, tapi muni neanca ka doa. Nadeamo vei tona nakadoa, navasa-vasa, ante dua balengga.
Maupu mauda ngena nontalu pura vaimo sani ri pelono. Nesuvu mami ntaluna bojejere. Ledo masae najadimo sani kodi danorabu-rabu ri uve. Ledo nasae mevoromo ia netu ri kulita, nesode ra, bo nanggeni dua. Ane malolongomo karo bo narindi muni sakide iyamo itu. Panguli nu doktoro malaria.
Jadi komiu pakanoto mami rara, tora mami 3M panguli pamarenta (Molime - Motutui - Motaivu) nemo sampe rakalingasi. Batuana gahai, ralime bak ante matagara gagamo, ratutui pomboli uve, eva ri embere ato doro, ane maria bele-bele ato botolo-botolo le nipake rataivumo. Apa riasia hai pontalu nu sani.
Uda muni hie, ka komiu topo motoro bo oto. Nemo magasi-gasi gaga mopajala tue. Apa nalenguru dala.
Tapi kana ratora muni uda hie baraka dako ri Tupu Ala Ta’ala. Naria muni mbarasai belona uda. Jadi makodara vai doyatata naria vai rumpu, nadea vai tava nu kayu, manolu vai banua. Apalagi tona noparancina ato marisa, nadea vai vuana. Tapi uda hie leria belona ka topo bai kaluku, topo povai guyu. Rasukurita hie, tapi kana ratorata muni bahayana ala kita masalama. Tabe! (TORANGGALUKU)