PALU EOEO.....

Ngata Palu, Ngata Ntopogade

NARIAMO nesuvu atura nu pamarenta, bula meonga mpae baru makava ratagi puramo topo balu-balu ri bivi dala. Apa sisi vei, ri ngatata hie nadea gagamo topogade-gade ri bivi-bivi nudala.

Eva hamai ri ngayo nu BNS. Ri bivi dala hamai, nadea topo balu apel, lemo bo bua-bua ntainana. Ane raantoaka, ledo mami nabelo nikita nu mata. Rumba-rumba ri bivi dala, kana naria topo gade. Nompaka da vai, balu-balura napopomo nitadiakara vai risia hai. Kaupuna narumpu bo navau ngata.

Ledo aga ri ngayo nu BNS. Ri ngayo nu SMP 3 muni topo balu-balu muni nadea nompanene. Risia hai naria topo balu lemo bo semangka. Hamai ri sinjori potomu Tavanjuka nadapa vai. Ri bivi-bivi dala hamai, domo aga topo balu cakar nopanene. Topo balu bau, parancina, marisa bo topo balu uta-uta nariamo muni hamai.

Aga hai bara rapatoraka komiu pamarenta, mabelo-belo mangulika topo balu-balu gahai. Nemo ante bilisa. Raulika mami Pol PP, nemo manggasepa molivu tona. Ringatata hie muni danadeapa tina-tinata nolemba loka bo cangkore. Geira hai aga nolipa ranga nelelea lokara, jadi rumba kamaga nu kada, risia haimo petara. Bo notomoraka topangali.

Geira hai nemo ntoto rapopalaimiu, dosa mbaso rakava miu. Apa ledo ranga naoge ali nuloka bo cangkore nilembara hai. Belona vai ane ra ali miu puramo lokana bo tudu manjilimo geira. Adomo ranga malenge Ina molipa hau lipa tumai. (TORIBOYA)